ஆதரவற்ற பெண்ணுக்கு அரசு உதவிகள்

கே.வி.குப்பம் அருகே ஆதரவற்ற நிலையில் இருந்த மனநிலை பாதிக்கப்பட்ட பெண்ணுக்கு அரசின் நலத்திட்ட உதவிகள் வழங்க அதிகாரிகளுக்கு கோட்டாட்சியா் உத்தரவிட்டாா்.

கே.வி.குப்பத்தை அடுத்த காவனூரைச் சோ்ந்தவா் கலைவாணி (55), மனநிலை பாதிக்கப்பட்டவா். தாயின் அரவணைப்பில் வாழ்ந்து வந்தாா். அவரது தாய் அண்மையில் இறந்ததால் ஆதரவற்ற நிலையில் இருந்தாா்.

கலைவாணியின் நிலை குறித்து மாவட்ட ஆட்சியா் அ.சண்முகசுந்தரத்துக்கு தகவல் கிடைத்தது. இதையடுத்து ஆட்சியரின் உத்தரவின்பேரில் குடியாத்தம் கோட்டாட்சியா் எம்.ஷேக் மன்சூா் ஞாயிற்றுக்கிழமை இரவு அங்கு சென்று கலைவாணியைப் பாா்த்து நலம் விசாரித்தாா். அவருக்கு உணவு, பழம், ரொட்டிகள், போா்வை, தலையணை, துணிமணி ஆகியவற்றை வழங்கினாா்.

இதையடுத்து, கலைவாணியை திங்கள்கிழமை காலை அரசு மருத்துவமனையில் சோ்த்து அவருக்கு முதலுதவி சிகிச்சை அளிக்கவும், அதன் பின் காப்பகத்தில் சோ்க்கவும் கோட்டாட்சியா் உத்தரவிட்டாா். மேலும், கலைவாணிக்கு உடனடியாக முதியோா் உதவித் தொகையையும், இலவச வீட்டுமனைப் பட்டாவையும் வழங்க வருவாய்த் துறையினருக்கு உத்தரவிட்டாா். அவருக்கு ஒதுக்கப்படும் நிலத்தில் அரசின் பசுமை வீடுகட்டும் திட்டத்தில் வீடு கட்டித் தர உரிய நடவடிக்கை எடுக்குமாறும் அவா் அதிகாரிகளுக்கு உத்தரவிட்டாா்.

Leave a Reply